La Calzada espera a les campeones del Telecable pa celebrar la Copa Intercontinental

L'equipu yá viaxa per carretera a Xixón, depués d'aterrizar en Barajas sobres les 14 hores dende Arxentina, pa la celebración cola afición.

El pabellón de Mata-Xoven yá acueye a numberoses persones a la espera del autocar que trai dende Madrid al Telecable Solimar, que tuvo problemes mecánicos, polo que la hora de llegada, prevista pa les 21 hores, va retrasase pa depués de les 22 hores. Un percance que nun va fadiar la folixa prevista esta nueche en La Calzada na que tien anunciada la so presencia la conseyera de Cultura, Política Llingüística y Deporte, Ana Vanessa Gutiérrez.

El club de ḥoquei patinos femenín ganó'l domingu la Copa Intercontinental na población arxentina de San Juan al derrotar al Generali Palau de Plegamans catalán nos penaltis depués de finar el tiempu reglamentariu y la prórroga con empate a 3 goles. Un fitu históricu, porque supón algamar l'únicu títulu que-y faltaba y por completar asina un añu y mediu perfeuto al ganar los 4 títulos de la temporada pasada (Supercopa, WSE Champions League, Copa y OK Lliga), más el de meyor equipu d'Europa y Suramérica na actual, al igual que la Supercopa d'esta mesma campaña.

La receición na Casa Conceyu va retrasase al llunes, yá que les de Natasha Lee tienen qu'afrontar competición lliguera. El sábadu enfréntense n'Aragón al Esneca Fraga (19.30 hores).

Na semeya, el Telecable y el Barcelona, campeón masculín al derrotal na final al Porto (6-3), celebren xuntos el títulu.