El Sporting nun atopó portería nel derbi

|
Uviéu 0-0 Sporting (17 de payares del 2019)

La falta de pegada tornó a condenar al Sporting. L'equipu de José Alberto nun s'atrevió a dir a pol partíu cuando más apertaba al Uviéu y tuvo que conformase con un empate insuficiente pa dambos nun derbi ausente de fútbol nun prau imprauticable.

El derbi asturianu del Tartiere de la temporada 19/20 nun pasará a la historia. Ye más, los aficionaos de los dos equipos fadrán un esfuerciu por esborrialu de la memoria.

Nuna campaña horrible de los conxuntos asturianos de Segunda, que se prometíen baillar na parte alta de la tabla y s'atoparon cola dura realidá d'una categoría na que naide nun regala un res, Uviéu y Sporting empataron ayeri a nada nel partíu más esperáu pola hinchada. Tuvo dalgo más de presencia ofensiva'l Sporting, con dos ocasiones mui nidies nes botes de Djurdjevic, una en cada metá, la primera salvada con una mano milagrosa de Champagne, pero José Alberto, que colocó a Salvador ente los centrales nuna defensa de 5, con Molinero y Damián Pérez de carrileros, nun foi valiente cuando los sos homes taben empezando a meter mieu al rival avanzada la segunda parte.

Per parte del Uviéu, que tuvos los sos meyores minutos na primer metá, namái Ortuño xeneró una aición de peligru, controlando col pechu dientro del área y disparando a Mariño nuna posición complicada pa sorprender al gallegu. El restu del tiempu dambos equipos compitieron a errores nun partíu nel que la intensidá nes aiciones foi lo único que dio dalgo d'emoción a los espectadores.

El Sporting caltién la decimosesta plaza con 18 puntos, 3 más que l'Uviéu, vixésimu, esto ye, en puestos de descensu. Mui lloñe queda l'Albacete, equipu que marca l'oxetivu mínimu impuestu poles dos entidaes esta campaña, les eliminatories pol ascensu, y un poco más la segunda plaza, qu'ocupa'l debutante Fuenlabrada, con 28.

Na semeya, arriba al fondu, grupu d'aficionaos del Sporting que s'axuntó na zona visitante tres algamar entraes al traviés de socios del Uviéu. El club roxiblancu refugó recibiles por entender escesivos los controles de seguridá qu'obligaben, al igual que los dos años anteriores, a tar n'El Molinón cuatro hores enantes del partíu pa desplazase con escolta al Tartiere.

Contador Estadistiques